محمود داود:تعليقاً على منع د.باسم يوسف من قناة الناس
 |
Date: 2012-01-17 20:24:02 |
 |
تعليقاً على منع باسم يوسف من الظهور في قناة الناس.
من الاخر وببساطة وبالبلدي كمان ..أنا هقول مجرد رأي يعبر عن نفسي..ولم أكن”أنتوي” كتابة هذا المقال ولكن لولا “بيان د باسم يوسف” وبعض الاراء المستفزة على بعض صفحات الأصدقاء.
لقيت تعليقات كتير “انا سلفي واعترض على منع باسم يوسف من الظهور في قناة الناس” و” انا اخوانجي واعترض على منع باسم يوسف الخ الخ”
ولما هقول “السلفي والاخواني” مش بقصد التعميم ولكن بقصد البعض اللي اعترض فقط وراح كتب على صفحتة ولا كأنه كده بقى رجل حقاني وزي الفل!
طيب يا عم السلفي والاخواني: ليه ما شفناك بتعترض على “باسم يوسف” وهو بيسخر من خلق الله؟ هتقولي مهو برنامج ساخر..هقولك عايز تسخر من اراء الناس بشكل ظريف اتفضل خد راحتك..لكن تسخر من شكلهم؟! هل هما اللي خلقوا نفسهم؟
الاخت “عبير” في احداث امبابة تناولها سخر من شكلها؟! و حلقة”كيسي نبيل” كان ينظر لها وبيمسح “الريالة” من على فمه؟! هل ده له علاقة بالسخرية؟!
مهو ممكن برضة واحد يسخر منك يا حاج باسم على “اللدغة” بتاعتك ويقولك: انت بتتكلم ب “3″ حروف بس والباقي ضاع منك؟ ولا كنت جعان واكلت باقي الحروف؟! وبلاش تحط “أيلينر” تحت عينك عشان ده حريمي خالص؟! عادي يعني الشباب الظريف كتير وبيعرف يسخر! بس انا أرفض ذلك تماماً.
يا عم السلفي و الاخواني: ليه ما شفناك بتعترض على “باسم يوسف” لما سخر من “الرجم” مش الرجم ده في دينك برضة؟!
يا عم السلفي والاخواني:ليه ما شفناك بتعترض على “باسم يوسف” لما كذب على الشيخ “ياسر برهامي”؟! حتى لو لم تحب الشيخ ياسر برهامي فأعترض على المبدأ نفسه وهو عدم الكذب على أي شخص حتى لو مختلف معه؟!
أنا هريحك يا اخويا السلفي والاخواني ..تحبوا اقولكم ليه معترضتوش عليه لما عمل كده؟
معلش يا “د باسم يوسف” سامحني في اللي هقوله..دي الحقيقة..لما كنت بقولهم ليه مش بتعترضوا كانت اجابتهم ” لو كل “….” عوى وألقمته حجراً لصار الصخر مثقالاً بدينار”..وكمان بعضهم قال: يا عم ده شخص”مهرج” يعني وظيفتة”يضحك” الناس ولازم يكذب على الشيخ ياسر برهامي ولازم يسخر من شكل الناس عشان يضحك غيره اومال هيضحكهم ازاي؟! فأقنعوني انك شخص لا تستحق الرد.
*أما اعتراض دكتور باسم وجملتة “إذا كانت أغنية عملت كل المشاكل دي إذن فلنطالب برجوع مبارك والحزب الوطني الذي سمح بمساحة حرية أفضل من ذلك.”
بجد والله يا دكتور؟! هو انت ليه عندك ازدواجية؟ولا مش عارف تستنبط؟ ولا مش عارف تعبر عن اللي جواك؟!
طيب يا سيدي انا هوافقك مبارك “سمح بمساحة حرية ” هل كنت تقدر تروح تنتقد مبارك في “وجهه”؟! يعني هل مثلاً سمعنا ان “مبارك” قابل وقعد مع” عبد الرحمن يوسف” الذي هجى مبارك في شعره؟ هل سمعت ان مبارك راح وجلس مع”الاعلامي حمدي قنديل” الذي صرخ في وجه الطغيان؟ هل سمعت ان مبارك جلس مع” الشيخ وجدي غنيم” الذي فضح النظام السابق؟! بالطبع لا.
فإن كان مبارك سمح لهم بمساحة حرية ولكن لم يجلس معهم لانه يرى ان فعلهم فعل قذر بالنسبة له..كذلك فعل “قناة الناس” تركت لك الحرية والمساحة ان تصنع ما شئت وهي رفضت ان تستضيفك في حلقة بعد علمها بحقيقة اغنية اخوانجي؟!
فهل مثلا قناة الناس منعنت برنامجك في “قناة ساويرس” اللي جابك من صفحات “اليوتيوب” وعملك استوديو وبرنامج ومايكات بقى وشغل عالي؟!
*اكيد هيجي في بالك وتقول:إذا كان الاخوان لم يعترضوا ؟! وبعض الشباب الاخواني قال الاغنية جامدة ودمها خفيف؟!
طيب يا عم أصحاب القناة عندهم “مبدأ” ورفضوا انك تكون موجود..ولا يلزمهم موقف الاخوان انفسهم! فما شأنك أنت؟!
*أكيد هتقول:يعني عمرو حمزاوي والابراشي وغيرهم لم يعترضوا على التيار الاسلامي من قبل؟!
أنا أقول د عمرو حمزاوي والاستاذ وائل الابراشي والاستاذ مجدي الجلاد اخطئوا في حق التيار الاسلامي وأقول بعض اخطائهم كانت “متعمدة” لكن الواقع: ان د عمرو حمزاوي نائب في مجلس الشعب , والاستاذ وائل الابراشي رغم توجهة إلا انه وقف ضد نظام مبارك وله ثقلة في عالم الإعلام والاستاذ مجدي الجلاد رئيس تحرير جريدة..ويعتبروا من الرموز الليبرالية..وبصراحة مشوفناش “د عمرو حمزاوي ولا الاستاذ وائل الابراشي ولا الاستاذ مجدي الجلاد” واقف يترقص في اغنية وبيسخر فيها من الاخوان؟!..أما “د باسم يوسف” أنت مين ؟!
وبعدين السخرية بتكون من شىء “وقع بالفعل” اما الاخوان لسه بيقولوا يا هاادي وانت تقول” انا اخوانجي ايوة انا كلامنجي؟”هما فين الكلامنجية دول؟
*أكيد هتقولي انا مين؟! مهي القناة هي اللي طلبتني مش انا اللي طلبتهم؟!
عادي يعني القناة طلع عليها “المسلم والمسيحي والعالم والطالب والاستاذ والتلميذ ومن كل الاطياف” وانا لا انكر ان للدكتور باسم يوسف” جمهور” واسم الفقرة”عشانك يا مصر” ولم الشمل والحاجات الجميلة دي..ففتحت القناة ذراعها لكل المخالفين..ولكن لما وجدت منك الاغنية غيروا رأيهم؟! ايه المشكلة في كدة؟
*وتعليق دكتور باسم: اللي خايف يروح ! ولا وكمان بعض الناس بتقول: منعه من الظهور معناه عدم القدرة على مواجهتة؟!
بصراحة ده كلام سخيف جداً لان هذه الفقرة لا تعتبر فقرة”مناظرات” وحلقة الاستاذ وائل الابراشي مع الاستاذ نادر بكار كانت في منتهى الود..وحلقة الدكتور عمرو حمزاوي كانت رائعة..يعني الفقرة دي مش للمناظرات..وبعدين انت رايح تسألهم؟ ولا هما اللي هيسألوك؟! اكيد هما اللي هيسألوك: يبقى ازاي تقول هما خايفين من مواجهتي؟ يعني بالعقل هما اللي هيسألوك وكمان خايفين؟! فياريت نقول كلام منطقي شوية.
*وكمان انت اعترضت على عرض فيدوهات لك وقلت اشمعنى”دكتور عمرو حمزاوي” يبقى مين اللي خايف من المواجهة بقى؟!الحقيقة انت خايف تواجه نفسك بفيدوهاتك صح؟! ولو قلت فيديوهاتي موجودة على اليوتيوب واعرضوها براحتكم بعد الحلقة او قولوا عناوينها للمشاهدين…معلش يعني أكيد الأثر بيكون مختلف لما تنكر شىء وتتفاجىء تلاقي فيديو لنفسك بيرد عليك في نفس اللحظة ..وده هيكون أقوى من ان تلقى نفسك بترد على نفسك بعدها بيوم؟! فبلاش نضحك على بعض..عرفت مين اللي خايف من المواجهة
*اما كلام دكتور باسم: ان قناة الناس بذلك اساءت لللاعلام الاسلامي ككل؟!
طيب هل انت ترضى ان الاستاذ الاعلامي “محمود سعد” لما جاب مُعد القناة ولبسه”جلابية” وخلاه يعمل انه من حزب النور وهيئة النهي عن المنكر والامر بالمعروف وكذب على المشاهدين ! وهو بذلك اساء للاعلام الليبرالي ككل..ولا هتقولي لا بلاش تعمم وده مجرد موقف عابر؟!ولا لما انت كذبت على الشيخ ياسر برهامي برضة هنقولك ان ده يسىء للاعلام الليبرالي ككل؟!
*اما كلامك لما بتقول: انا عملت حلقة عن ساويرس صاحب القناة و الكتلة؟
طيب ليه مثلا لم تتناول فيديو ساويرس وهو بيسب الدين؟ليه لم تتناول ساويرس لما سخر من الاسلام؟ليه لم تتناول ساويرس وهو بيشجع على التدخل الغربي لمصر؟..أه صحيح لقمة العيش بقى والرزق يحب الخفية.
*وبتقول دي مش ديمقراطية ودي بوادر نوايا التيار الاسلامي يمنعوا اللي ضدهم؟
أولاً محدش منعك انت في قناتك زي ما انت ولك جمهورك..لكن القناة “ملكية خاصة” ومن مبادىء الليبراليبة: ان كل شخص حر في ملكيتة الشخصية ما لم يضر بالصالح العام..لان مثلا مش قناة حكومية ملك الدولة عشان تقعد تملىء الدنيا صراخ و عويل وتقول منعوني ودي مش حرية ودي ديكتاتورية؟! فانت هو الديكتاتور وأنت أول من خالفت مبادىء الليبرالية عندما لم تحترم رأي الآخر !
وفي النهاية:
أقسم بالله العلي العظيم خالق السموات والأرض أنه ليس لي أي علاقة بقناة الناس لا من قريب ولا من بعيد , وأنا عندي العديد من السلبيات التي اراها في “قناة الناس” وما كتبتة لا يعد دفاعاً عن القناة ولكن هو مجرد رأي في حدث قد وقع وأنا أرى ان القناة لم تخطىء في هذا الحدث كما ان الاراء المخالفة تقول ان القناة قد اخطئت فكل شخص حر في رأيه!
وأنا على اتم استعداد لتلقي الشتائم من كل شخص لم يحتمل رأيي عبر الفيس بوك وتويتر
كتبه محمود داود
للتواصل مع الكاتب عبر الفيس بوك: (محمود داود)
للتواصل مع الكاتب عبر تويتر: (Mahmoud_Dawoud1)
أخر التعليقات